Lompat ke konten Lompat ke sidebar Lompat ke footer

Lirik Karungut Dayak Ngaju Isna Herlinda - Peteh mandehen ranying hatalla

Hajamban karungut inyampai sarita
ampin kuasa ranying hatalla
manjapa petak langit balawa
tuntang kalunen kahapus dunia

pahayak nyahu kilat balwa
auh te sulak hinje Hatalla
jete auh puna kuasa
mampaingat itah je ela laya

Ranying hatalla tamparan huran
langit lumbah akan katambuan
manjapa petak je tapajakan
tuntang nyalung je kapanduyan

Ranying hatalla puna pamasi
hayak tempu kuasa hai
masi kalunen gagenep biti
bakas tabela je kurik hai

Ranying hatalla pamasi tutu
dengan panungkup je raja bunu
utus kameluh balimut batu
hajamban behas itah balaku

ranying hatalla je katamparan
taluh handiai jadi ngajadian
pahayak pancar intan kaharingan
cahaya pambelum bazaman zaman

jaminan pambelum huang dunia
pantai kalunen jadi inampa
lewu tatau atau sorga
tiwah suntu jadi inenga

peteh Hatalla paham baguna
akan itah bakas tabela
kurik hai dia imbeda
jalan belum tarang balawa

ela sampai je dia bingat
balaku dengan je sahur sambat
ranying hatalla manenga berkat
mangat pambelum sanang salamat

buah itah je hinje pakat
babimbing lenge pikiran bulat
sahur parapah tatap marapat
ranying hatalla santar memberkat

itah penyang je hinje simpei 
mungkal indehen kampungan atei
tikas tuh karungut je bara ikei
tau akan penyang tampung karuhei

Tentang karungut :

Karungut adalah kesenian lagu kuno khas asal Kalimantan Tengah yang dijunjung tinggi oleh suku dayak ngaju. 

Ini sastra lisan patun dinyanyikan secara merdu mendayu dayu selama 10 menit tiap lagu dengan hanya diiringi oleh 3 alat musik saja yaitu petikan kecapi, katambung dan seruling. (tanpa dukungan alat musik modern lainnya). 

Lirik karungut mengisahkan tentang kehidupan, harapan, nasihat, pekerjaan, keluh kesah, persahabatan, pemujaan dan cinta. 

Pada zaman dulu kala, karungut dinyanyikan oleh para orang tua saat malam hari untuk menceritakan kisah lubuk hatinya kepada anak anak dan keturunannya di masa depan.